ბათუმის მრავალფეროვან გარემოს, ცოტა რამ თუ გამოხატავს ისე, როგორც ქუჩის მხატვრობა (სთრით არტი). ხელოვნების ამ მიმართულების დამსახურებით, ბათუმის ქუჩებში, ქართული მოტივებისა და თანამედროვე სტილის შერწყმას ხშირად შეხვდებით.
თითოეულ მურალს საკუთარი ისტორია აქვს და კონკრეტულ გზავნილს ატარებს.
ჩვენი დღევანდელი ბლოგი, ბათუმის ,,სთრით არტის” ყველაზე გამორჩეულ ნამუშევრებს ეძღვნება.
კუპატა
ავტორი - გიორგი გამეზარდაშვილი (George Gamez)
ბათუმში, მემედ აბაშიძის 60 ნომერში, საქართველოს ბანკის შენობის კედელზე, ბათუმელების ყველაზე საყვარელი ძაღლის, „კუპატას“ ნახვას შეძლებთ, რომელიც ცნობილი მისი მზრუნველობით გახდა. ის ბავშვებს ქვეითთა გადასასვლელზე ეხმარებოდა, ხოლო დაუმორჩილებელ მძღოლებს - გულმოდგინედ უყეფდა.
