Ბათუმის მოზაიკები

პოსეიდონი

ეს ცნობილი მოზაიკა, ბათუმში, სანდრო ახმეტელის ქუჩაზე მდებარეობს. მოზაიკაზე ძლევამოსილი, ზღვების მმართველი, პოსეიდონია გამოსახული, რომელიც ნამდვილი ხელოვნების ნიმუშია და ყურადღებას გარდა ოსტატურად შესრულებისა, შინაარსითაც იმსახურებს.

დელფინი

მოზაიკაზე გამოსახული დელფინი, რომელიც ფერადი ქოლგის ქვეშ ნახტომს აკეთებს - თავისუფლების, ჰარმონიისა და მხიარულების სიმბოლოა.

დელფინები და პოსეიდონი 

6 მაისის პარკში, დელფინარიუმის მიმდებარედ, პოსეიდონის ერთ-ერთი ყველაზე ძველი და ცნობილი მოზაიკაა. მასზე გამოსახულ პოსეიდონს დელფინები და ულამაზესი ოქროს თევზები  წრიულად თავს ეხვევიან.

მარმარილოს მოზაიკა პიაცაზე

ძველ ბათუმში, პიაცას შუაგულს, მარმარილოს ულამაზესი მოზაიკა ამშვენებს, რომელიც ევროპაში ყველაზე დიდ მოზაიკად არის აღიარებული. მარმარილოს ელემენტებით მოჭედილი წრეები და მოზაიკაზე გამოსახული წყლის ხუთი ღვთაება მუდმივი მოძრაობის სიმბოლოა. 

ზოდიაქოს ნიშნები 

ბათუმში, პუშკინის ქუჩაზე, 12-სართულიანი საცხოვრებელი კომპლექსის შესასვლელი  ოსტატურად შესრულებული მოზაიკით არის გაფორმებული. მოზაიკაზე წრიულად  გამოსახული ზოდიაქოს ნიშნები ნამდვილი ხელოვნების ნიმუშია. 

დელფინები კოლონადებთან

ბათუმის ბულვარში, კოლონადებთან, სადაც მილიონობით ტურისტი სეირნობს, დელფინების არაჩვეულებრივი მოზაიკა დაგხვდებათ. იგი თავისი მინიმალისტური სტილით გამოირჩევა და ძველი ბათუმის იერსახეს წარმოადგენს. 

დელფინები აკვარიუმთან 

ბათუმის აკვარიუმის მიმდებარედ, კედელზე მოცულობით მოზაიკას შენიშნავთ, რომელზეც მზე, ზღვა, დელფინები და თოლიებია გამოსახული. მოზაიკა აკვარიუმის თემატიკას იდეალურად ესადაგება და იქ მისული ადამიანების ყურადღებას მარტივად იპყრობს.

Moët & Chandon Crémant Impérial (ალფონს მუხას ანალოგი) 

ეს გიგანტური მოზაიკა კი, ალფონს მუხას მიერ შესრულებული ნამუშევრის ქართული ანალოგია, რომლის ნახვასაც ბათუმში, პორტის  შესასვლელთან შეძლებთ. მოზაიკა მდიდარი ფერებით, შესრულების მაღალი ხარისხით და ფრანგული ელემენტებით გამოირჩევა.