გონიო არაერთი უნიკალური მახასიათებლის გამო საქართველოს ერთ-ერთ ყველაზე გამორჩეულ ადგილად შეიძლება ჩაითვალოს. სტატიაში სწორედ ამ მახასიათებლებზე მოგიყვებით და თქვენს დარწმუნებას ფაქტებით შევეცდებით.

ჩვენი ყოველდღიურობა სავსეა პასუხისმგებლობებით, შრომით, ახლის სწავლით, რასაც დიდი ენერგია მიაქვს. ამიტომ, გამუდმებით ვცდილობთ განტვირთვას, რათა შევივსოთ ახალი ძალებით და ჩვეულ ცხოვრებას მეტი ხალისით დავუბრუნდეთ. 

ნამდვილი დასვენების მოსაწყობად, ორი ფაქტორი უნდა გაითვალისწინოთ: ვისთან ერთად აპირებთ დროის გატარებას და სად. პირველ კითხვაზე პასუხი თქვენთვის მოგვინდია. მეორე კი ნამდვილი დილემაა, რომელსაც დღეს თქვენთან ერთად გადავწყვეტთ.

სრულყოფილი დასვენების ძიებაში

ვინც არ უნდა იყოთ და რასაც არ უნდა ეძებდეთ – მთას თუ ზღვას, სიმშვიდეს თუ თავგადასავალს, ისტორიულს თუ თანამედროვეს, გონიოში სრულყოფილი დასვენებისთვის მყუდრო კუთხეს აუცილებლად იპოვით. გონიო სწრაფად განვითარებადი კურორტია, რომელიც ბათუმის ცენტრიდან 12 კილომეტრში, მდინარე ჭოროხის მარცხნივ, მდებარეობს. ის დღითიდღე უფრო და უფრო მეტ დამსვენებელს იზიდავს, რასაც თავისი მიზეზები აქვს.

ბუნების ჰარმონია და გონიოს უნიკალური მიკროკლიმატი

გონიო უნიკალური მიკროკლიმატით ხასიათდება, რასაც მისი მდებარეობა განაპირობებს. ზღვის ფართო სანაპირო მთის ძირშია გაშლილი. სეირნობისას ერთდროულად გრძნობთ ფიჭვნარისა და მარილიანი ზღვის სურნელს. წყალი სუფთა და ცისფერია, ტალღები — მშვიდი, ჰავა კი თბილი. დაივინგის მოყვარულებს აქ შავი ზღვის ღრმა ფსკერი იზიდავთ. ასევე, ადგილი საინტერესოა პარაპლანის მოყვარულებისთვის, რომელთაც შესაძლებლობა აქვთ, ციდან დააკვირდნენ მთებისა და ზღვის უნიკალურ შერწყმას. კურორტი არაერთ რეკრეაციულ ზონას და მწვანე სივრცეს აერთიანებს, რაც ურბანული ცხოვრებისგან დისტანცირების და სიმშვიდის განცდას გიტოვებთ. ზღვის სანაპირო დიუნებს შორის პატარა ტბასაც ნახავთ, რომელიც წვიმის წყლით საზრდოობს, რაც გონიოს საოცარი ბუნების კიდევ ერთი მაგალითია.